АКАФИСТ
Священномученику Сергию (Лаврову),
протоиерею Тамбовскому

Кондак 1

Иерей истовый, священномучениче отче Сергие, горних сокровищ усердный стяжатель! Ты во время гонения явил веры свет благодатный, им же мрак безбожия расточил и уберег души верных в годину темную. Неугасимый светильник православия, бденно молися о всех нас у престола Господня. Аллилуйя.

Икос 1

Неприкровенный источник светозарной любви Христовой иссек в сердце своем, благодерзостный отче, и не преткнулись многие во тьме пагубной. Молимся тебе:
Радуйся, священномучениче отче Сергие, избытник тьмы беззакония;
радуйся, пути ко спасению светлосиянный озаритель.
Радуйся, милосердия сокровище неистощимое;
радуйся, закона Господня сосуд чудный.
Радуйся, протикор в скорбях пребывающим;
радуйся, страждущим порука крепкая.
Радуйся, любящих тя присное наставление;
радуйся, прибежище наше и защищение.
Радуйся, отрада наша и утешение;
радуйся, Церкви Православной похвало и утверждение.
Радуйся, новый мучениче, древним великим мученикам равночестне;
радуйся, священномучениче отче Сергие, скорый помощниче всем, с верою и любовию к тебе притекающим.

Кондак 2

Исправитель беспутства, последовав Господу всем сердцем своим, неуклонным детоводителем ко Христу Богу нашему явился еси. Священномучениче отче Сергие, молися Господу Иисусу Христу, чтобы и нас наставил ходить стезями правды. Аллилуйя.

Икос 2

Амвросией небесной сердца юных насыщал, страх Божий насаждая, во еже, повзрослев, не уклонились на путь греха, а в благонравии пребывали. Прилежный учитель слова Божьего, молимся тебе:
Радуйся, священномучениче отче Сергие, священнослов водушевленный;
радуйся, промыслитель отроков.
Радуйся, милосердный пестователь юных;
радуйся, мудрый чадоводец.
Радуйся, учитель благочестия;
радуйся, искоренитель нечестия.
Радуйся, преградитель растлителей;
радуйся, обличитель неправды.
Радуйся, добросердный детовидец;
радуйся, благоплодный путетворник.
Радуйся, равностоятель праведников Божьих;
радуйся, священномучениче отче Сергие, скорый помощниче всем, с верою и любовию к тебе притекающим.

Кондак 3

Смиренный ревнитель, люботрудием своим воздвиг храм и благочестно в нем службу Богу творил. Священномучениче отче Сергие, молитвами твоими у престола Господня вразуми и нас благолепию Церкви поспешати. Аллилуйя.

Икос 3

Чудный образ горнего Храма измлада соткался в сердце твоем, отче преусердный, и присно тщание прилагал ко всем постановлениям дома Господня и всем законам его. Молимся тебе:
Радуйся, священномучениче отче Сергие, Церкви Христовой неутомимый попечитель;
радуйся, храма Господня прилежный строитель.
Радуйся, богатство земное ни во что вменивый;
радуйся, тщание о благолепии дома Господня на сердце положивый.
Радуйся, радетель вместилища сокровищ небесных;
радуйся, украситель дома Божьего.
Радуйся, мудрый купец Царствия Небесного;
радуйся, ревнующих о благочестии помощниче.
Радуйся, цветник благочиния;
радуйся, трудник неустанный.
Радуйся, сообразник светлоподобников;
радуйся, священномучениче отче Сергие, скорый помощниче всем, с верою и любовию к тебе притекающим.

Кондак 4

Угодник Божий, среди мреж душетленных живодатный оплот делами любви утвердил ко водворению паствы своей в мире и тишине. Священномучениче отче Сергие, вкупе с ангелами слушающий слово Господне, сподоби и нас, молящихся тебе, сохранять души наши в чистоте непорочной. Аллилуйя.

Икос 4

Апостолодержательный отче, чистым сердцем отвергнув ложь, вразумлял и поучал данную тебе Господом паству, и она шла за тобой, чуткая к гласу твоему. Молимся тебе:
Радуйся, священномучениче отче Сергие, твердыня Церкви Православной;
радуйся, Христа своим упованием именуяй.
Радуйся, пастырь добросердный;
радуйся, податель Таинств Божьих.
Радуйся, садарь добродетели;
радуйся, простобеседный световодец.
Радуйся, врачеватель неправдования;
радуйся, увещеватель неразумных.
Радуйся, научаяй нас во всем упование наше на Бога возлагати;
радуйся, наставляяй нас в мире сем хладном согреватися любовию к Христу Богу.
Радуйся, Духа Святого обитель прекрасная;
радуйся, священномучениче отче Сергие, скорый помощниче всем, с верою и любовию к тебе притекающим.

Кондак 5

Страж Церкви Христовой, узрев меч идущий, вышел на пажить паствы своей и Словом Божьим, яко огнем, попалил плевела лжеименного прекословия. Священномучениче отче Сергие, молися у престола Божьего о наставлении и соблюдении сердец и помышлений наших во Христе Иисусе. Аллилуйя.

Икос 5

Лукавых обольстителей ловитвы сокрушил, прелесть ниспроверг, угасил лихоимство, вразумляя не богатства мирского искать, а в Бога богатеть. Молимся тебе:
Радуйся, священномучениче отче Сергие, Церкви Христовой зоркий страж;
радуйся, смиренных сердцем попечение.
Радуйся, Христа своею крепостью нарицаяй;
радуйся, наставниче в миролюбии.
Радуйся, сокрушитель злоименных;
радуйся, преградитель прещений.
Радуйся, вразумитель корыстолюбцев;
радуйся, поругатель злоречивых.
Радуйся, единославник праведников;
радуйся, отче многохвальный.
Радуйся, за ны пред Престолом Божьим молящийся;
радуйся, священномучениче отче Сергие, скорый помощниче всем, с верою и любовию к тебе притекающим.

Кондак 6

Хранитель заповедей, любовь имевши к собрату своему, не проходил мимо страждущего, врачевал уныния, пресекал распри. Священномучениче отче Сергие, молитвами твоими да сподобимся совершенными воедино быти. Аллилуйя

Икос 6

Осолил душу свою пламенем любви Христовой, содружник алчущим и жаждущим правды, яко ветвь Лозы благодатной, принес много плодов добрых.
Молимся тебе:
Радуйся, священномучениче отче Сергие, свершитель заповедей Господних;
радуйся, радетель присносущного братолюбия.
Радуйся, единитель правдоревнивцев;
радуйся, великодушия преизобильство.
Радуйся, облегчитель трудников;
радуйся, изрядный друголюбец.
Радуйся, стяжания тленная презревый;
радуйся, милосердный щедролюбец.
Радуйся, тягот житейских одолетель;
радуйся, неустанный купнотрудник.
Радуйся, отче неукорный;
радуйся, священномучениче отче Сергие, скорый помощниче всем, с верою и любовию к тебе притекающим.

Кондак 7

Радетель милосердия, злых гонителей не убоявшись, неутомимым печальником Церкви Христовой был. Священномучениче отче Сергие, не оставь и нас милосердными молитвами твоими у Престола Господня. Аллилуйя.

Икос 7

Избытник теснений, противостал нечестивцам, дерзнувшим восхитить сосуды священные, поспешник терпящим гонения правды ради, почесть твоя – Царствие Небесное. Молимся тебе:
Радуйся, священномучениче отче Сергие, граблению Церкви противление;
радуйся, не устрашивыйся грядущего мучения.
Радуйся, умиритель сердец ожесточившихся;
радуйся, благотворник притесняемых.
Радуйся, утешник отчаявшихся;
радуйся, общник христолюбцев.
Радуйся, исправитель неправдований;
радуйся, печали на радость переменяющий.
Радуйся, сторицею дающий в нищете пребывающим;
радуйся, оставивших надежду на руце свои приемлющий.
Радуйся, Царствия Христова наследниче;
радуйся, священномучениче отче Сергие, скорый помощниче всем, с верою и любовию к тебе притекающим.

Кондак 8

Искоренитель лжесловия, не уловился сетями басен лукавых, а, оградившись щитом слова Божьего, бесстрашно ратоборствовал раскольников Церкви. Священномучениче отче Сергие, наставь и нас, молящихся тебе, твердо стоять в вере православной. Аллилуйя.

Икос 8

Крепкодушный отче, за благочестие исконное подвизался еси и сподобился вкупе с сонмом новомучеников российских стать непоколебимой опорой Православия. Молимся тебе:
Радуйся, священномучениче отче Сергие, Церкви Христовой столпе несокрушимый;
радуйся, положник правды.
Радуйся, обличитель адотечных отступников;
радуйся, попратель лицемерных братогубцев.
Радуйся, преградитель зловерия;
радуйся, пресекатель ядоносного лжесловия.
Радуйся, оборитель льстивых святотатцев;
радуйся, порушитель мреж пагубных.
Радуйся, осрамитель лжеглаголивых;
радуйся, отженитель ненавистников правды.
Радуйся, наставляя нас веру православную твердо содержати;
радуйся, священномучениче отче Сергие, скорый помощниче всем, с верою и любовию к тебе притекающим.

Кондак 9

Свершитель Таинств Божьих, не преткнулся соблазном раздора, благомудреный блюститель заповедей, радователь кротких. Священномучениче отче Сергие, моли Бога о даровании мира душам нашим. Аллилуйя.

Икос 9

Оружие Света, отче преблаженный, страх пред богоненавистниками ничтоже почтя, вверил душу свою в руце Божьи и приготовлял верных к вечери Агнца. Молимся тебе:
Радуйся, священномучениче отче Сергие, паствы Христовой усердный окормитель;
радуйся, верных к славословию Бога воздвигающий.
Радуйся, веры христианской небоязненный проповедниче;
радуйся, скорбящих всежелательное утешение.
Радуйся, бедствующим и обидимым покровительство;
радуйся, боголюбивых душ непостыдное упование.
Радуйся, к присномилостивому Христу наставляющий;
радуйся, в скорбях земных на Бога уповавший.
Радуйся, научая нас не боятися человеческих прещений;
радуйся, вразумляя нас любить ближних наших.
Радуйся, светило благочестия, во тьме пагубной воссиявшее;
радуйся, священномучениче отче Сергие, скорый помощниче всем, с верою и любовию к тебе притекающим.

Кондак 10

Твердый началоводец, не обинуясь, исповедовал Христа, неправды и злословия с кротостью принял, истинствуя велегласно. Священномучениче отче Сергие, бденно молися у Престола Божьего, чтобы уберег нас от тенет вражьих. Аллилуйя.

Икос 10

Не прельстился посулами нечестивцев, наветом злоречивых в узилище томим, и даровал тебе Господь подъяти страдания и запечатлети веру и великую любовь к Богу. Молимся тебе:
Радуйся, священномучениче отче Сергие, Церкви Христовой славный исповедник;
радуйся, непорочный победник скверников.
Радуйся, неприступная крепость праведности;
радуйся, преградитель неистовых хульников.
Радуйся, несокрушимый щит Православия;
радуйся, гонителей богопротивных посрамитель.
Радуйся, милосердный скорбей врачеватель;
радуйся, благодерзостный обидимых предстатель.
Радуйся, муку и болезни в заточении претерпевый;
радуйся, исповедниче Христов сладкогласный.
Радуйся, рая жителю всеблаженный;
радуйся, священномучениче отче Сергие, скорый помощниче всем, с верою и любовию к тебе притекающим.

Кондак 11

Обагрил кровью непорочной ступени храма Божьего, благотерпеливо страдания принял, добропобедный отче, тем умостил нам, молящимся тебе, путь к сладчайшим плодам веры православной. Аллилуйя.

Икос 11

Единострадалец мучеников Христовых, зверонравные губители сталью смертоносной ребра твои прободеша, веры же крепчайший алмаз не могли сокрушить. Молимся тебе:
Радуйся, священномучениче отче Сергие, смерти телесной не устрашивыйся;
радуйся, все упование на Бога возложивый.
Радуйся, Христа вседушно возлюбивый;
радуйся, кровью своей любовь к Нему явивый.
Радуйся, зверонравных истязателей бесстрашник;
радуйся, лютых мучений претерпеватель.
Радуйся, многодерзостный пострадатель;
радуйся, приснопетый литургисатель.
Радуйся, светлостный тьмы озаритель;
радуйся, терпения твердейшего явитель.
Радуйся, бесстрастный свидетель Истины;
радуйся, священномучениче отче Сергие, скорый помощниче всем, с верою и любовию к тебе притекающим.

Кондак 12

Страдания до смерти претерпел, злых гонителей не убоялся, кровью свидетельствовал о Христе и обрел обетованный Им венец жизни. Священномучениче отче Сергие, молися у Престола Господня о нас, чтущих твою память верно. Аллилуйя.

Икос 12

Церкви Христовой поборник, слаце последняя твоя: с праведниками соводворился в селениях вечных, идеже не смолкает глас радования, со ангелами славословия Богу творящий. Молимся тебе:
Радуйся, священномучениче отче Сергие, страдалец крепкодушный;
радуйся, первомучеников подобник.
Радуйся, страстотерпче, в мужестве неодолимый;
радуйся, терпением своим мучителей посрамивый.
Радуйся, крепчайшее основание благоверия;
радуйся, духоносец дерзновенный.
Радуйся, стяжатель венца славы;
радуйся, сонаследник Царствия Небесного.
Радуйся, сликовник ангелов;
радуйся, ибо пребогатно наследие твое.
Радуйся, ликовствуяй, ибо велика твоя награда на небесах;
радуйся, священномучениче отче Сергие, скорый помощниче всем, с верою и любовию к тебе притекающим.

Кондак 13

Пастырь добрый, священномучениче отче Сергие, ты во время гонения безбожного не пощадил жизни своей за паству Христову и присно будь для любящих тя путетворным светильником ко спасению душ наших, да сподобимся купно с тобою славити Отца и Сына, и Святого Духа. Аллилуйя.

(Затем читается икос 1 и кондак 1)